Gipanawagan ang mga local chief executive dinhi sa Bohol nga motabang sa paghatag og impormasyon sa publiko kabahin sa pagparehistro sa mga SIM Cards nga gisugdan karong adlawa.

Si Jerome Gonzales provincial director sa Department of Interior and Local Government (DILG) mi-ingon nga kaabag ang ilang ahensya sa pagpakatap og saktong impormasyon sa publiko sa SIM card registration.

Una nang nanawagan si DILG Secretary Benjamin Abalos Jr., ngadto sa mga LGU nga giyahan publiko sa saktong pamaagi sa pagparehistro sa sim card og ipasabot usab kung unsa ang dala nga benipisyo niini.

Matud ni Gonzales nga suportado usab nila ang himoon nga mga pamaagi s LGU sama sa pagbutang og mga help desk aron maduolan sa publiko nga magpangutana kung unsaon ang pamaagi sa pagparehistro.

Ang Tagbilaran City nagbutang na og booth sa SMART alang niadtong buot masayod sa mga impormasyon sa pagparehistro.

Gi-awhag usab ni Gonzales ang mga opisyal sa kalungsuran nga giyahan ang katawhan gikan sa pagsugod sa SIM registration hangtud sa pagtapos niini.

Ang mga sim card users gihatagan lang og 180 ka adlaw aron magparehistro.