Gi-awhag ni Mayor Costan Reyes sa lungsod sa Ubay ang mga negosyante sa pagbubo og puhonan sa lungsod, kini human gi-ablihan sa Du Ek Sam ang pinakadako nilang tindahan dinhi sa Bohol.
Si Gobernador Aris Aumentado, CEO sa Du Ek Sam nga si Engr. Ryan Du ug Mayor Reyes maoy nangulo sa gihimong blessing ug ribbon cutting sa maong tindahan nga nahimutang sa barangay bood sa Ubay.
Matud ni Reyes nga dakong tabang ang pag abli bag-ong istablisemento sanglit ang lungsod nagpadayon sa pag agni sa mga mamuhunan nga mosulod sa Ubay.
Gibutyag ni Reyes nga sa pagkakaron pipila na ka mga dagkong patigayon ang nisaad nga mosulod sa Ubay sama na lamang sa puregold, island city mall og sikat nga fast food chain.
Ang lungsod sa Ubay usa sa mga progresibong lungsod sa Bohol nga kandidato pagka syudad.
Karong bag-o ang Provincial Development Council (PDC) ni-aproba sa resulosyon sa Municipal Development Council nga naghangyonsa pagrekomenda sa balaudnon ni 2nd district Congresswomen Vanessa Aumentado nga himoong science city ang lungsod sa Ubay.
