Ang bag-o nga lima ka andana nga edipisyo sa Gov. Celestino Gallares Memorial Medical Center pormal nga nagbukas sa iyang serbisyo sa panglawas ngadto sa publiko niadtong Biyernes uban ni OIC Health Secretary Maria Rosario Vergerie.
Ang ubang opisyal sa DOH nga mitambong atol sa inagurasyon mao sila si Undersecretary of Health Usec. Camilo Cascolan, Director IV- Health Facilities Enhancement Program Dr. Leonita Gorgolon ug DOH Regional Director Bernadas.
Si Dr. Mutya Kismet T. Macuno, hepe sa ospital nangulo sa mga opisyal ug personnel sa ospital atol sa mahinungdanong okasyon nga naghatag sa Bohol og garbo nga adunay labing modernong tambalannan nga gipanag-iya ug gipadagan sa Gobyerno sa tibuok Rehiyon VII.
Gipasigarbo sa ospital nga adunay labing menos pito ka mga bag-ong serbisyo nga mahimong parehas sa bisan unsang nag-unang mga pribadong ospital sa nasud.
Kini mao ang Heart Station, Eye & Ear Center, Travel Medicine Clinic, Endoscopy, Urology and Stone Center, Respiratory Unit ug ang Geriatric Center.
Samtang gikalipay usab ni Gobernador Aris Aumentado ang pag modernize sa kanhi Bohol Provincial Hospital diin usa sa panglanataw niini ang kahimsog sa panglawas sa katawhang bol-anon.
