Siyam sa matag 10 ka mga Bol-anon ang natagbaw sa mga nahimo ni Gob. Edgar Chatto basi sa bag-ong Bohol Poll sa Holy Name University (HNU) Center for Research and Publications.

Kini nagpasabot sa 89 porsento (89%) ug positive 85 (+85) net satisfaction rating sa mga Bol-anon ngadto sa gobernador sumala sa survey nga gihimo sa Hunyo 10 – Hulyo 20 ning tuiga.

Ang +85 net performance rating ni Chatto nagpakita’g 4 pontos nga pagsaka gikan sa +81 sa niaging tuig.

Ang samang survey nagpakita sa 25 pontos nga pagsaka sa net satisfaction rating sa promosyon sa investment sa probinsiya gikan sa +36 sa niaging tuig ngadto sa +61.

Nisaka usab ang rating sa kapitolyo sa paghatag og kahigayonan sa panginabuhi ug trabaho, pagpanalipod sa kalikopan, promosyon sa turismo, pagsiguro sa pagkaon, ug pagpanalipod sa kinabuhi ug kabtangan.

Labing taas ang pagsulbong—34 pontos—sa net satisfaction rating sa mga Bol-anon ngadto sa probinsiya sa pagkigbatok sa korupsyon gikan sa negative 10 (-10) ngadto sa +24.