PORMAL nga buksan ug sugdan ang labing dakong kompetisyon sa belen sa Bohol sa CPG Park sa atubangan sa bag-ong kapitolyo karong 5:30 sa hapon.

Usa ka milyon ang kinatibuk-ang ganti, apil ang grand prize nga P350,000 gikan sa probinsiya.

Atol sa seremonya, mosulti si Gob. Arthur Yap agi’g pagdasig
sa kompetisyon.

Apil nga manguna sa programa sila si Acting Gob. Rene Relampagos, Provincial Administrator Kathyrin Fe Pioquinto, Bishop Alberto Uy sa Tagbilaran ug Bishop Patrick Daniel sa Talibon.

Bendisyonan ang mga belen nga makita na karon sa CPG Park, diin usab nahimutang ug nagpadayon ang Kasadya sa Pasko – Christmas Village nga gipasiugdahahn gihapon sa kagamhanang probinsiyal.

Ang indigay sa belen gisalmotan sa Syudad sa Tagbilaran ug mga lungsod sa Antequera, Baclayon, Bilar, Catigbian, Cortes, Dauis, Jagna, Loboc, Maribojoc, San Miguel, Sevilla, Sikatuna ug Valencia.

Naglaray na karon sa CPG Park ang ilang mga belen alang sa pormal nga pagbukas sa kompetisyon—human sa misa pasalamat nga magsugod sa 4:30 karong hapon.

Ang ikaduhang ganti mokantidad og P250,000; ikatulo, P150,000; ug lima ka consolation prize nga P50,000.

KUTOB RA SA PETSA 15

Ang kompetisyon ug pasundayag sa mga belen hangtud lang sa Disyembre 15, kanus-a ipahibaw ang mananaug ug himoon ang awarding.

Human sa awarding, ibalhin sa mga LGU ang mga belen ngadto sa ilang mga dapit aron ipasundayag sa ilang mga plaza ug masaksihan sa ilang katawhan hangtud sa pagsud sa bag-ong tuig.

Aduna say kompetisyon sa daygon nga gipasiugdahan gihapon sa kapitolyo uban ang kinatibuk-ang premyo nga mokabat og P600,000, apil ang grand prize nga P150,000.

Ang indigay sa belen ug daygon nagsubay sa usa sa mga “four pillars” sa administrasyon ni Yap nga mao ang “cultural reawakening.”

Mao usab kini ang labing dako ug lapad nga kompetisyon sa belen ug daygon sa Bohol sukad-masukad.

by: VEN ARIGO