IPAILAWOM ang tibuok Bohol sa state of calamity gumikan sa nagkalapad nga epekto sa El Niño, ilabina sa panguma ug panubig.

Kini maoy naigo-an sa unang full-council meeting sa Provincial Disaster Risk Reduction and Management Council (PDRRMC) ubos sa bag-ong tsirman nga si Gob. Arthur Yap sa kapitolyo ganiha.

Sayon ang paggamit sa calamity fund sa matag LGU kon ang tibuok probinsiya deklarado nga anaa sa estado sa kalamidad.

Unom na ka mga lungsod ang nideklarar og state of calamity nga mao ang Pres. Garcia, Sierra Bullonjes, Candijay, Antequera, Alicia ug Batuan.

Gipaabot ang deklarasyon sa pagpaubos sa tibuok lalawigan sa state of calamity pinaagi sa resolusyon sa Sangguniang Panlalawigan basi sa rekomendasyon sa gobernador ug PDRRMO.

Dugang upat ka mga lungsod ang posibleng modeklarar og state of calamity ug kini ang San Miguel, Carmen, Guindulman ug Pilar.

Anaa sa Pilar ang labing dakong irrigation dam sa Bohol, apan bisan ang tubig niini apektado na usab sa El Niño o huwaw.

Sa pagpaubos sa probinsiya sa state of calamity, gikonsiderar PDRRMO ang taho sa PAGASA sa nagpadayong huwaw ug nagkalapad nga sektor sa agrikulturang apektado na kaayo.

by: VEN ARIGO