GITUL-ID ni Gob. Arthur Yap ang hiwi ug malisyosong inpormasyon nga kuno ibaligya ang mga tambalanan nga gipanag-iya ug gidumala sa probinsiya.

Sayop ug bakak ang maong estorya nga gipakatap sa mga kritiko, matud sa gobernador.

Ang panglingla nikatap hangtud sa facebook, sumala sa taho nga niabot ngadto usab sa mga tambalanan ug sa Provincial Health Office.

Ang giingon ni Yap ngadto sa media mao nga buot niyang mo-invest ang pribadong sektor sa pag-ugmad sa kapasidad sa mga ekipo sa mga tambalanan sa probinsiya.

Partikyular niini ang pagbutang og mga diagnostic equipment ug ubang pasilidad sa laboratoryo alang sa sayong deteksyon ug paglikay sa mga seryosong sakit.

Apil niini ang mga ekipo sa dialysis, MRI ug uban pa sa mga tambalanan nga layo na kaayo sa syudad sa Tagbilaran.

Pinaagi sa partnership, ang pribadong sektor ug ang goberno pwede pong magsabot sa pagbansay-bansay sa mo-operate sa mga ekipo.

Ang pribadong sektor o inbestor pwuedeng mga doktor o mga anaa mismo sa propesyon sa panambal.

Ang kagamhanang probinsiyal magpabiling tag-iya sa mga tambalanan bisa’g adunay mga ekipong gibutang ang pribadong sektor o inbestor.

Ang bayronon sa paggamit ug serbisyo sa mga diagnostic facilities dili bug-at sa mga ordinaryong pasyente kay subayon ang mga rates basi sa balaod sa Universal Health Care o Philhealth.

Si Yap inisyal nga nagplano nga magbutang og mga dialysis centers sa mga district hospital sa Jagna ug Carmen ug provincial hospital sa Talibon.

Dunay mga pasyenteng gikan sa layong kalungsoran nga magpa-dialysis sa Gallares Hospital sa Tagbilaran apan di kasigurong maatiman tungod sa daghang pasyente.

Ang dunay ikagasto mapugos sa pagdangop sa mga pribadong tambalanan bisa’g mahal.

Matud ni Yap, ang pag-ugmad sa kahimanan sa mga tambalanan uban ang tabang sa pribadong sektor nga way dakong gasto sa pasyente makaayo sa kinabuhi ug kondisyon sa pamuyo sa mga Bol-anon.

Sumala sa pipila nga taga-hospital, ang nagpataka’g estorya posibleng wa kasabot—o tuyong di mosabot kay gustong molawgaw sa administrasyon sa lalawigan.

“Di nato ilawgaw o itumo-tumo ang maong isyu kay uroy’g ang magkinahanglan sa maayong serbisyo sa hospital sa probinsiya ang ato mismong sakop sa pamilya,” matud sa usa ka doktor.

writer: Ven Rebo Arigo