GIPASIDUNGGAN sa nasud ang liderato ni Gob. Edgar Chatto sa Bohol nga nag-ila, mabinantayon ug nagtubag sa way kinutobang hagit sa kausaban sa klima.

Sa ngan sa gobernador, gidawat sa iyang chief of staff nga si Liza Quirog ang Climate Reality Leadership for Governance Award didto sa National Museum for Natural History sa kaulohan.

Ang pagsukip sa climate change adaptation sa daghang aspeto sa pagdumala seryosong gihimo sa probinsiya ubos ni Chatto.

Kini bulawanon ngadto sa usa ka islang lalawigan nga giila sa iyang pagbarug, pagsugakod, paglahutay ug pag-abante bisan sa unsang kalamidad ug hulga sa kinaiyahan.

Uban kang Quirog sa pagdawat sa pasidungog para sa gobernador ang presidente sa Bohol Association of NGOs nga si Emi Roslinda.

Ang labing ulahing pasidungog ngadto kang Chatto ug kagamhanan sa lalawigan naggikan sa Climate Reality Project inubanan sa Climate Change Commission sa Pilipinas.

Sa iyang pamahayag, gitumbok sab ni Quirog ang suporta ni Kong. Rene Relampagos sa mga paninguha sa probinisiya ubos ni Chatto.

Ang Bohol Environment Code namugna sa administrasyon mismo ni Relampagos isip gobernador kaniadto. Bise gobernador si Chatto sa maong panahon. (Ven rebo Arigo)