GIMUGNA sa Department of Environment and Natural Resources (DENR) ang Regional Foreshore Area Task Force aron mopatuman sa mga balaod sa kalikopan sa mga isla sa Mactan sa Sugbo ug Panglao sa Bohol.

Sa Regional Special Order No. 2018-95 niadtong Lunes, Pebrero 26, gimando usab ni DENR Regional Director Gilbert Gonzales ang pagtukod sa PENRO ug CENRO og kaugalingong mga team sa pag-abag sa regional task group kon kinahanglan.

Ang task force gitahasan ning mosunod:

• Moimbentaryo ug mosusi sa mga establisamento duol o naa gyod sa mga baybayon;
• Moila sa mga establismaneto nga dunay mga istruktura sa gawas na sa propriedad niini ug kadtong nakasupak sa mga balaod sa solid ug waste water management;
• Mohimo og labing updated nga lista sa tanang establisamentong nakalapas sa mga environmental laws, apil ang way pagtugot nga mga istruktura sa sud sa 20 metros gikan sa high tide warterline; ug
• Pagdeterminar ug pagrekomendar sa pagsira sa establisamento ug boluntaryo nga pagguba sa nakalapas nga istruktura sud sa tulo ka buwan.

Ang regional task force makarekomendar sab sa pagsang-at og tukmang kaso batok sa malapasong establisamento.

Si PENRO Nestor Canda maoy overall coordinator sa regional task force ug si Atty. Junalit Molo ang team leader para sa isla sa Panglao.

Apan sa wa pa ang mando sa DENR-7, nasabotan sa konperensiyang gipatawag ni Gob. Edgar Chatto niadtong Sabado ang pagmugna og hiniusang task group nga motabang sa pagpatuman sa mga environmental laws ug mopatunhay sa kalinaw ug kahusay sa Panglao, lakip ang isla sa Balicasag.